مبدعو مصر
ياشيرين ياضي الضحي
شعر : محمد عبد القوي حسن
***
وماتشتهيش الضي في الليل المسافر
ولاتكتبيش حرف الكلام المر
في ضلوع النهار
ولاتنزليش وقت العصاري
تخضري ورق الشجر والبرتقان
عنب البراءة في عرف اعمي مش بريء
دم البكارة السايل علي ترعة جنين
يشعل حريق
ماتشندليش الحس جوانا
ولا تحرقيش عضم الكلام ف الضهر
من نبضك الساخن
ماتوزعيش دمك الحر في عروق الخيانة
ولاتبحتيش قبرك ف عرف باع الامانة
الصبح مش اخضر لموني
في عيون الانكسار
والعهر لابس مرودين سواد
اللي مضوا علي القرار
انهار شلال دما الاحرار بين دار لدار
ولاحد بيحد السيوف
علي رقاب الغطرسة ويشل لستعمار
بيبان في عين المبتلي
حزن النجوع ع الجوع
ودموع ربوع المنتهي المصلوب
علي عيدان المدار
من عنفوان خزي السكك
مصلوب صباحك في مدار الانحدار
متكتفة نبضات حنينك بين انينك
وانت بتواجهي الرصاص
بيموت وريد
حامي بيحمي دم متجمد
وينسكب وسط النهار
ياشيرين ياضي الضحي
بتكتبي الاناشيد مرارة في عرفهم
وتكشفي دم الخيانة
اللي معشش
فوق جبين الاحتلال
معدوم صفه
ومسموح له تفحيم الضلوع الابيه
في خيمة الانصهار
قد يهمك أيضا
ارجع لنا قصيدة بالعامية مهداة للدكتور جمال التلاوي .. شعر محمد عبد القوي حسن