بلياتشو.. شعر: رقيه اسماعيل

بلياتشو
…..
على حبال السنين
أرواحنا تتنطط
كما البلياتشو
جوة السيرك
نتشعبط
مابين الروحة والجاية
نسيب ناس
قلبها متبت
ونمسك في اللي سايبِنّا ونستعبط
في وسط الرحلة بنقابل
وشوش بتمر كالأفلام
وناس ف ارواحنا بتعلم
كما الاقلام
وناس بتمر وتسلم
وتمشي أوام
وناس بنسيبها وبنبعد
لتتشعلق في طيف احلام
وناس تحيا وناس بتموت
وناس موتها حياة وجنة
وناس من كتر ما عاشت
تموت من خوف ماليها سكوت
وناس على جوعها مجبورة
وناس من خوفها مقهوره
وناس بتموت ومنصورة
وناس تشبع بتصبيرة
وناس من كتر ما بتشبع
بتشكي الفقر والأيام
وناس شبعانة حمد وصوم
تنام بالجوع ومنه تقوم
وناس هايفة وناس شايفة
الهموم ف اللبس والحنة
وع الأحوال.ماتستنى
وناس عايلة وضهور مايلة
وناس م العفة مش قايلة
وناس ع العمر تتعكز
يمر المر .ماتركز
وناس شايلة وايدين طايلة
وبنغير يوماتي وشوش
لزوم الضحكة والسمعة
واهي دايرة
وبتلف في مشاعرنا
تتوهنا وتلفحنا
تمرجحنا
وتتدبحنا
نفوق بنلم في جراحنا
نلاقي ارواحنا بتسيب الحبال
وف ثانيه بتسقط
بدون حتى ما ترمي سلام.
#رقيه اسماعيل