مبدعو مصر
ارجع لنا
قصيدة بالعامية مهداة للدكتور جمال التلاوي .. شعر محمد عبد القوي حسن
بالعزم قوم يابطل
وبقوة الإيمان في قلبك
كمل طريق العلم والتعليم
إنسان كريم
دكتور عظيم
من نسل كله طيبة وكرم
وأنت الهرم
في العلم تبني صرح عالي للحياة
وفي الأدب بنيت كتير
مواويل لشط النيل بترسمها بأناملك
وإحنا علي دربك نسير
ولايوم نحيد عن الطريق الصًح
أشجار كناريا كلها بتغني للقادمين
وبتدعي للراحلين
وبتفتح الأبواب لكل الطالبين
ترانيم بتطلع من خيوط الفجر
وتمحي معالم الليل البهيم
شمس الشموس طالعة بتغسل عيون الطيبين
وتمسح دموعهم بالندي البكري
وهما للغيطان طالعين
وبالإيمان شايلين
وللعيدان حارسين
وع السكك صابرين
غنوة ف وردية مصانع مصرنا
ونسمة حلوة بتهفهف
علي جبين المغرمين
ارجع لنا ببسمة ضياك
نسمة صباك
ضحكة فناجينك مع رؤياك
بسمة رياحينك مع موسيقاك
حبك لمصر وللوطن
وللجنود الساهرين
دعمك لكل السالكين طريق العلم
وبالامل مستبشرين
وللعمل متوكلين
وأنت اللي مادد يدك الطاهرة
لكل الجيل
وكل أجيال التعلم والعلوم
والنابغين
والحارسين
والساهرين
والعاشقين مصر بضياها
والحافظين نغمة صباها
والفارشين قمرة سماها
وردة في عيون القادمين
وأنت ابن نيل الغارسين
بذرة ثمارها بالعرق
وعلي الإله متوكلين
والرب عاطينا وراضينا
طلع لنا من صلبها
راجل متين
وإحنا إليه متشوقين
فارجع لنا
علشان نكمل حلمنا
من بين بساتين المني
طالع معطر بالحنين
قد يهمك أيضا
التلاوى يلتقى طلبة وطالبات المعهد العالى للغات بالمنيا /مجلة /مبدعو مصر