مبدعو مصر
قصيدة بالعامية جديدة للشاعر الجنوبي بكري عبد الحميد
ليل البنات متغطي بالأحلام
والحلم كان خوّان
كان ليه بنعشق
لما الحبيب ح يغيب
وليه نقول للودع
على جرح ماله طبيب
وشوشت يوم الدكر
لكنه ماسمعنيش
الحزن كله حضر
جار وحدتي ح يعيش
ليل البنات ان غدر
غدره مايرحمنيش
ليل البنات اتغطى بالأحلام
ليل البنات يا ناس ..
ماهوش بينام
خبّط بإيده .. فوق قزاز الروح
وفتحت له الشباك
قول لي ياليل ..
على فين كده ح تروح
الليل سكت ..
وسكوته كله كلام
فرشت رمشي على طول الهوى
بس الهوى باعه
أنا كنت من غير هدى
مد الهدى دراعه
وكنت ليه شكوته ..
وكل أوجاعه
الصبر مني اشتكى
والشكوى منـّه حرام
دمعي ف عينيكم بكى
على قلة الخلان
ليل البنات ان صدق
تتسرسب الأحزان
قد يهمك أيضا