مبدعو مصر
مسعود شومان / باكتب عشان تحلا مرارة العيشه
باكتب عشان وشك ينور أكتر
باكتب عشان العشره ما بتهونش
بأكتب عشان طعمك يدوب فى لسانى
بأكتب عشان وعشان
عن ولد غلبان
بينادى فى القطورات عسليه يا مسمسمه
وعيونه م الشباك تبعت كلام للسما
وعن صبيه نديه
قلبها مفروط
وعن يمامه طايره من غير جناح
لسه رايحه الغيط
شايله حلة طبيخ والغنا فى لسانها
باكتب عشان الجنان حاجزينه جوه القسم
وبيهينوه بالاسم
مجنون
وجنانه ما بيخونش
قلبه ملفوف فى الورق
وكل يوم بيلونه بريشه
باكتب عشان تحلا مرارة العيشه
حروف كأنها سلسال ندى
تلمع على شعر الكديشه
فيحبها الصبى
وصدرها يرعرع
وعسلها يجرى ع الشفايف أكتر
باكتب عشان روحك يا قموره
رسمت لى صوره
وحيتنى بعد ما مت ست سنين
وعلقت اسمها ورده على الجناحين
تغمز برمش العين
و تقول لى خبينى
قبل الجروح ما تمطر
باكتب عشان وشك ينور أكتر
مسعود شومان
