مبدعو مصر
ليل الامانى تغربه الايام . شعر: محمد عبد القوى حسن
ليل الامانى تغربه الايام
تتفتت الاحلام على جسر الضنى
الغربة تاخدك لسكة الاوهام
والحزن يرمى توب الهموم على كتافك
حاولت تصنع فجر للضحكة
وحاولت ترسم بدر فى السماوات
وحاولت تصبح زى خلق الله تطير بجناحات
فجأة وريشك يطير من على جسدك
فجأة جناحتك تتكسر
تسقط بدون اسباب
ولا تقدر تطير تانى
ولا تقدر تعود للعش
العش بين قلب الجريد بتنعكشه الريح العتية
ترجع كطفل فقد امة فى ليلة عيد
قلبك بينزف والوريد خلاص ماعاد ينبض
انت مش مكتوب للسعادة
ولا انت زى خلق الله ممكن يكون لك طير وليف
انت اتخلقت للهموم والويل
استغفر الله العظيم
من كل ذنب
واكتب كتاب قلبك الميت على الاحزان
ولا تعشم الروح اللى هامت من جديد للبوح
اسكن ف قلب النوح
وانزف دماك على الاسفلت
وانتظر الموات