قصيدة بالعامية المصرية للشاعر: احمد الجزار
وشوشت ليل الوجع
بينت له وجعي
راح قالي يادي الجدع
أرفع أيديك وادعي
أنا جوا قلبي سواد
وشكاوي دمع عباد
ونار ماليها رماد
وأنت إللي شوفته بسيط
يعني يدوب مدعي
الاوله ندمان
علي قد ما اديتها
وهي ما ادتني
غير بس دمعتها
وطلعت أنا الغلطان
والتانيه زعلان
علي خطوه خطيتها
ما حسبت حسبتها
نسيتني مانسيتها
الحب طبعه جبان
والتالته غفلان
وكشفها ليا الزمن
خاينه ولا تؤتمن
وباعتني بارخص تمن
وأنا كنت ليها أمان
كان نفسي اسامح
بس معرفتش
واكدب عليها
واقول خلاص
إني مزعلتش
واللي اتهدم فيا
إن الوجع فترات
وإن الحقيقة ساعات
تبني وماتهدش
رغم أني مش حريف
ومعاها شيء شفاف
ولا كنت يوم خواف
من حاجة بعملها
لا دريت ولا خبيت
جايز أنا استغبيت
في حكايه أولها
كان نفسي أشوفك سند
ومعايا مش ضدي
أنا رامي فيكي حمول
والله ماتتعدش
والله ماتتعدش
……..
#احمد الجزار
اقرأ المزيد:
عاش الاستاذ شعر: محمد عبد القوي حسن
قصيدة شعر بالعامية المصرية للشاعر: عادل زوين
إلى حبيبي محمد مغاوري.. من شعر العامية المصرية للشاعر البرمبالي