مبدعو مصر
قصة حُب…!!! شعر : فاطمة المرسي
بحب الشاي يكون كُشري
واموت في الكُشري بالدٓقّٓه
وحاجه حِرشه أو حَدقه
وشُرب القهوه بعد الفجر
وقرطاس لِب فى البلكونه
ساعة العصر
واحب العيشه ببساطه
سوداني مقلي وبطاطا
وصوت الحركه فى الميادين
واحن لصوت فريد وحليم
وبنت الفقرا ليلى مراد
وصوت ثومه فى سيرة الحب
وريحة الحاتي لما تهب
وكوباية عصير خروب
تكون بارده وتروي القلب
وطعميه وعيش بلدي
ودخان الدُره المشوي
وصوت البياعين بدري
وجرس الفُسحه لمَّا يرن
وبيت العيله لما يُضم
وصوت فايزه فى عيد الأم
واحب اللمه في رمضان
وشكل موائد الرحمن
واحب التين..
وقمر الدين..
وطاجن رز بالقشطه
في فرن الطين
واصلي في الحسين جمعه
وجمعه تانيه فى القلعه
وطعم الفته فى الأعياد
وريحة المحشي فى الحَلَّه
وشُرب الميَّه م القُلَّٓه
وقصة حب بين شاديه وذو الفقار
وحمحمة الحمام فى الدار
يطير ويُحُط عَ الغَلَّه
باحِن تملي للماضي
طبيخ أمي وضحكتها
ولمتنا في حضرتها
ولما بافتكر صوتها
ألاقي الدنيا ضحكت لي
واحس طفولتي رجعت لي
واعيش تاني فى قصة حُب…
فاطمة المرسي