مبدعو مصر
بيان عاجل / قصيدة بالعامية المصرية للشاعرة نادية فتوح عضو اتحاد كتاب مصر
بيان عاجل
وطاقة نور ،،
معدية تشق الموج
وصوت م الفرحة بيناغي
أطل هناك
ألاقي سفينة الحرمان بتغرق شوق
وترجع تاني تتلفت
و م الفرحة وم اللهفة بتعلا لفوق
تفرق ع القلوب أنسام
وسرب حمام
بيغزل للأماني طريق
مابين الفجر والمشرق وأول ضوء
وانا وحدي اللي بافرد فيه جناحاتي
ملاك آتي من الجنة
مسافر بين دروب أحباب
بيفتح للهوى أسباب
ويقفل راضي ألفين باب
في وش التوهة والغربة
فيهرب كل شوق كداب
بيشبه حلم كان لي زمان
يا حضن أمان
وعشق ناداني رجعني
و كنت خلاص
غريقة ف سكة التوهان
بيان عاجل ،،
بعلو الصوت وباعلنها
يا جذوة نار وسكينها
بتدبح فيا للآخر
و ﻻ اتاخر ..
واقرب لك كمان اكتر
و ﻻ باسأل عن اﻷوجاع
و ﻻ افكر
حبيبي خلاص
باقولها لك
و اعيدهاكمان
د انا قلبي سنين ساكن
في ليل قبلك ضلام داكن
و جيت وبقيت لي كل الناس .
أقرأ أيضا/ شهادة حق يا أهل الله شعر : علي نوح