مبدعو مصر
والمنيا عروسة ف الزفة
طالعة من العدوة
في موكب من الإبداع
واصله لديرمواس
والعمر ليها شراع
صبيه صعيدية
آية في جمال الكون
الطيبة طبع اهلها
اما السماحة الشال
شابة بتكتب سحرها للضي
وتوهب عشقها للمي
وترسم أماني الطلعة
من فجر ضحكتها
امانة يارايح الفولي
سلم علي الكورنيش
ولو انت طالع للبهنسا
سلم علي الصحابة
واكتب قصيدة في حب السبع بنات
واهدي أماني بسمتك للعاشقة ايذادورا
بحر شوي لعزبة الكيلو
اقرا الفواتح لطه حسين امير النور
واقطف من خد مانجتها
هوي محبتها
واكتب رضاك للنسمة
واغزل هواك م البسمة
واسرح وهيم
علي الكورنيش
وقول ياعليم
م الفجر طالع وبارع
وواخد الكون ف احضاني
خضرة واديها في مارس
ضحكة عنيها ف اغسطس
بسمة روابيها
في عيد النصر ف اكتوبر
وربنا عالم
انا قد ايه بسهر اناجي الهوي
قلبي بهواها اكتوي
وجدي من الفجرية نوي
يطوف في محرابها
ويغني علي بابها
غنوة لهدي شعراوي
وموال لمصطفي
وف سيدي احمد الفولي
كل الصحاب متجمعين
حضرة صفاء الوفا
حضن النعيم والرضا
نشرب ف شايك الاخضر
والنجمة تتمخطر ف خد السما
وييجي القمر يغسل وشوش الصحاب
فنتبسم ف حالة رضا
ونغني من تاني
غنوة بنات الحي
ع الزراعية
ع الزراعية
المنيا فولي
هي ضيا عنيا
