إلا الرسول .. يا ماكر …. رون ..!! شعر: نبيل مصيلحي

إلا الرسول .. يا ماكر …. رون ..!!
ــ
شعر : نبيل مصيلحي
ــ
شُلَّت يدا
كل اللي خط بقلمه
فوق وش الورق
رسم الخيال
كتب الإساءة والشتايم
والسباب
واتخيِّل إنه عبقري
حَط من إسم الرسول
إزاي يكون ..؟!
ورب العزه من فوق
سابع سما
عَصَمُه وحماه
كل اللي حاصل .. من دا و ودا
حبَِة عَفَر
من ريح حقوده
ومجرمه
وقلة أدب
جهل وغَشَم
ودماغ حمار
غاوي النهيق
والفلعصه
إزاي يا جاهل
بعد آلاف السنين
لا عين رأت
ولا شوفت أوصاف
الرسول
بتخُط إيدك ع الورق
ترسم وتكتب
في النبي ..؟!
هوَّه اللي مؤمن بالإله
يجهل عليه ويسئ إليه ..؟!
مين اصطفى واختار رسول
واختار نبي .. مُش ربنا .. رب العباد
فازاي تحارب ربنا ..؟!
قول شأنك ايه ..!!
يا ابو عقل من حتة صفيح
كلْها الصدا
يا ابو قلب نار صابها الجنون
إتغمِّسِت بأبو لهب
إعلم يقييناً يا مسئ
إنك لا شئ
وانت كما كتير سبق
مسُّه الخبَّل
واتخيِّل إنه يحُط
من إسم الرسول
هيهات يا فسل
إن كنت ريِّس أو غفير
إن كنت شاه أو أمير
كونك صغير
كونك هاموش
كونك فاشوش
فتشوف بعين عتمه المدى
شوف يا جهول
إحنا اللي سيبنا في حقنا
وبعدنا عن درب الإله
ولهثنا خلف الكافرين
والمشركين
يرمونا في حُق الموات
معلوم تمام
يا ابو جهل يا راس العتام
اللي اتختم قلبه بسواد
محال ينول حب البشر
محال يكون إنسان بعقل
الحق حق بتعرفوه
أو تجهلوه
إن الإله سبحانه مُرسِل
للبشر منْ يصطفيه