مبدعو مصر
أنا لسه الواد القاعد ع الإمه
بيضفر فرحه من كبد الحاره
المليانه بالحواديت
وبكون الحارس وبهمه
علي كل حيطان الجار والجاره
ولأي عيال عماله تلعب بالكبريت
أنا لسه الواد ال بيجمع م اللمه
شيلان
ويغطي الروح البردانه وبكل أمان
ويعلم في عيال الحته
خمسه ف سته بالمجان
أنا لسه الواد اللي بيظأطط
لما الدنيا تمطر زي زمان
وافرح جداً لما يلفوا
وحوي ياحوي بفانوس رمضان
وارقص لما العم نبيل
يرفع إيده ف كل آدان
أنا لسه الواد المتعشم
في نجوم الليل
بلضم فوانسها بحوارينا
وبعد خيوط السما وافتل قناديل
وبضم السبل المتبعتر واقراه ترتيل
أنا حجر الزاويه في كل ملف
وحوادايه
أنا أصل ومعني وبصد وجعنا
بقراءة آيه
أنا سجر التين الطارح
والبلح المالي الوسعايه
أنا حرف وواقف ع القمه
مليان ذمه وعندي أماره
أنا جزء كبير
من أي قصيده أو أوبرايت
بقلم/فتحى نجم
مارس 2023
فتحي نجم الاسيوطي