ولا حتى وانت أسفلت.. قصيدة بالعامية للشاعر: محمد عبد القوي حسن
يمكن عشان الحضره مش منصوبه
او يمكن كيمان القش محتاجه لولعه
او ما نزلش لسه اكبر راس فى الطريقه
بتاجه المدهب والمرصع بالسيوف
من سما الاحباب والصحاب
او يمكن عشان البنت اللى عطتك كل ماعندها
وفجاه صدتك حسيت بكبت .. كبت اكبر من امريكاواكبر من هرم خوفو
واكبر من الالهه
فارتحلت ونهضت قمت
وقعت فى اكوام السنين الغابره
وحضرت شنطة سفرك لاى مكان
مهم وجوهري
ممكن تكون مش عارف تحدد ملمح
انت نفسك فى ايه
محتاج لايه
المهم انك عندك رغبه فى الترحال
وليه بالظبط وقفت فى نص البحر اليوسفى
ودست برجليك على جسد الكوبرى
الكوبرى المتقنطر على شطوط قريتين كانوا بعاد عن بعض
وحب الكوبرى الحديد يربطهم ببعض
ومش مهم الناس تدوس عليه
الكوبرى اللى بيربط بين بنى عامر وبنى خالد
يشبهك تماما
ومن تحت الكوبرى تعدى الميه
وجثث العيال الغرقانه بفعل فاعل
والغرقانه طفش / والغرقانه هروب
الغرقانه / والحقق الفاضيه
وكل متخلفات القرى
بتعدى عليه عربيات ربع نقل شايله حمير
ومواشى وجرجير- وفجل وحريم وبنات –
شنابات وعكازات –
وعجل وموتسيكلات –
وكارتات وجاموس وبقر
ومكن وغنم
وعيال حفيانه
وعيال هربانه
وعيال مرضانا
وعيال جوعانا
وعيال لصه
وبنات لسه ماحددتش ملمح
بنات بتحلم بالعدل وشيوخ عواجيز
قاعدين يفكروا فى اللى راح
وانت كنت عامل زى قطر الصعيد
الصعيد والسبنسه ايام الميرى
وبياعين الشاى والترمس والبليله
والامشاط والولاعات
والنصابين والحرميه والجزمتيه
والبلاليص والزلع
اكيد انت مش بتشبه لا للكوبرى ولا لقطر الصعيد
انت بتشبه لشىء مش قديم ولا جديد
شىء مافهش سما ولا قمر
ولانجوم ولا حوريات وعصافير وشجر ونخل
وبلح احمر وبلح اصفر
وترعه صغيره بتمر من جنب قصر كبير فيه جنينه
وقدامه خدم وحشم وبنات شربات
وحنين وسندس وزبرجد ونرجسيات
لا انت ما تشبهش حتى لفؤاد حداد وجاهين ومسعود شومان
ولا لك عنوان
انت مهمل اكيد
زى عود الملوخيه
اللى داس عليه الاتوبيس
فى قصيدة مش عارف تعمل وشك كيف
كان نفسك تبقى كومسرى اتوبيس
مزحوم على طول
او بياع شاى قدام مجمع التحرير
والناس ملمومه حواليك
وتلف عمه وتلبس جلابيه صعيدى
وتقعد على كورسى خشب
وتدلدل رجليك قدامك
والدنيا ما تسيعك
او كان نفسك تبقى صعلوك
مش كوبرى ولا قطر
او حتى زير نشفان
تحت شجره دبلانه فى منشية الجبل لصفر
او او انت ليه نسيت عشان تفتكر
وما حددتش مناهجك فى فهاريس اغترابك
وكل شىء متنطور فيك
المخيخ والجمجمه المولعه
وما بتؤمنشى ليه بالسحر والمطاريد
الهربانين فى غيطان طوالى
المطاريد
اللى شاربين الترع
وواكلين الدره
ومحمصين قلوب الخلق فى التوهه
ولا نفسكشى تبقى درويش
واقف تسقف فى وسط الحضره
وتساوى المريدين
وتلم حواليك المجازيب
يااااااااه ياسلام ع المجازيب
اجمعهم واعمل عليهم رئيس
ونعمل حضره على هيئة مؤتمر
او مؤتمر على هيئة اجتماع كبير
ونصرح بالقرارات اللى احنا عاوزينها
ومش هانكتب توصيات
كل اللى هانقوله هايتنفز فى الحال
هانطلع م الحضره المعموله فى اى مكان
كان شرق او غرب او حتى تحت تحت الارض
نكسر الاصنام والالهه والبوس ع اللايدين والانحنا
ونقول اللى احنا عاوزينه
يقوم واحد مجزوب ويقول نهد الصومعه ونكسر البلاليص
فى الحال كل شىء يتكسر
وندوس ع النمل ونموت الدود
نموت القطط ام عيون خضره
ونربط كل الحمير فى اعمدة النور
ونسيب القمر يدور
ايوه
مش احنا زعما الكون
لا فيه شىء هايهون علينا
ولا هانبقى دكتاتوريين فى شىء
نلبس الغفر براقع
ونولع فى البلاطى الانجليزى
ونسحب منهم البنادق اللى بتضرب لورا
ونسلمهم شوم
كل غفير شومه
وكل عيل من العيال الحفيانين نديله ( نبله )
وينشن على اللى هوه عايزه
يوقع غربان ويموت حيتان
ويسيب العصافير الوظاويظ تطير
ونطارد المطاريد
لا انا مش هاشبه لحد
انا نفسى اشبه لنفسى
لا لكوبرى ولا لقطر
ولا لشيخ الحضره
اللى بياكل الفحم والكلوح المجنهر
ويضرب الدبوس فى بقه الشمال
يطلعه من بقه اليمين من غير دم
والناس كلهم واقفين مساطيل
فى مولد اى شيخ فى الصعيد فى البحيره
والخليفه راكب الجمل
ومش باين من الهودج
فى وسط الزحمه
والناس نفسها تشيل الجمل بالخليفه
وزمر تركى
ومدافع
وكهارب
وبمب بيتفرقع على الاسفلت
الاسفلت اللى ساح واتشق
ايوه ممكن تكون انت تشبه فعلا للاسفلت
والمطبات والحفر
وكل الكون بيدوس عليك
مش بشويش
ماحدش بيفكر فيك
لا وانت كوبرى
ولا وانت قطر
ولا وانت شيخ حضره
وشايف ذنوب البشر قدام عنيك
ولا حتى وانت اسفلت
متشقق بيشربوا من دمك البنادمين ؟؟؟!!!
…………
#محمد عبد القوي حسن