ابو زيد بيومي يكتب : شكرا للفيس
شكراً للفيس
ــــــــــــــــــــــــــــــــــ
شكراً للفيس
يوم حطّ التاج
على راس التيس
وعصاية وسبحة
ف إيد إبليس
جبَّة وقفطان
على كتف خسيس
واللص التور
باحث دكتور
وعلوم مسروقة
من الكراريس
وكراسي وحاشية
وكام زفة
والكلب عريس
ألوان ووشوش
وحيتان وقروش
مماليك وكروش
وطريق مفروش
من غير ترابيس
سوق للعميان
فيه المستور زي العريان
والبايع فيه دايما كسبان
في السوق السودة ولا ينفع
غير التحسيس
في الضلمة عنيك مش مطلوبة
في الزحمة تعدِّي المعطوبة
في العركة يفوز صاحب الطوبة
والذمة السايلة المصبوبة
قدَّامها هويس
شكراً للفيس
عمل المهاويس
أُمَرَا وأطهار
والوش نهار
وضمير زنهار
والكلمة الخايبة بتتحوّل
حكمة وأشعار ..
على كام صفحة
بتحلّ الصعبة المعقودة
ف حبل المتاعيس
شكراً للفيس
فاتح بابه
للكدب يلملم أحبابه
إيه غير الزيف للكدب ونيس
شكراً للفيس
شكراً للفيس
ـــــــــــــــــــــــــــــــــ
