مبدعو مصر
يا بخت اللى بات مغلوب
شعر : محمد ضباشه
على إذاعة صهيل قلبي
بعت لقلبها مكتوب
حروفه شمس ما تخبي
ولع شوقى لجناح محبوب
ياخدنى معاه على موجة
ماتكسر فعلنا المنصوب
واكون جملة لها معنى
بتنسى الليل فى حضن قلوب
ولا تشوفني أكون عايب
ولا بين الورق شايب
وانا فى قربك بكون دايب
وبلبس روحي بالمقلوب
فسامحينى على عذري
وانا التايه نعاس وغروب
هجيب الحب م الأول
على ثغرك لأمحى ذنوب
وبين حضنك راح اتشاهد
بأن الشوق فى قلبى توب
مقاسه جد لمقاسك
وما ينفع لغيرك كوب
يبل بيه عطش قلبه
واكون من ودنى انا المسحوب
مسير الحب يتلاقى
ويا بخت اللى بات مغلوب