مبدعو مصر
يامصـــــــــــــر
للشاعر / محمد عبد القوى حسن
عضو اتحاد كتاب مصر
—————————–
بجمع كل افكارى
وارتب كل اشعارى
واقلب فى الكتب جارى
عشان اكتب قصيد لمصر
كتبت كتير ومش عارف
وقلبى بحبها جارف
وقلمى من الورق خايف
مايذكرشى جمايل مصر
ومااعرفشى منين ابدا
اقول من قبل ما ابدا
وقبل ما التاريخ يبدا
اخاف اغلط ولو فى الحصر
اقول من يوم كلام موسى
اقول من يوم ميلاد عيسى
خيوط الفكر محبوسه
تخاف ماتجبش شىء م الاصل
وغفرانك يارب استر
اخاف اغلط وما تغفر
نهار احمد وليل اشكر
عشان بلدى دى تبقى مصر
يابلدى ياقبلة الزوار
يامحموله ف قلوب ثوار
ومذكوره ف كتاب غفار
معاهدينك نجيب النصر
هجرتك والدموع فاره
وجيتك والدموع حاره
حلفت ما ابات ف يوم بره
رصيفك عندى مليون قصر