ولما مشيتي وفارقتي | قصيدة بالعامية للشاعر اسلام سلامة
ولما مشيتي وفارقتي
أنا وقلبي من الصدمة ماصدقناش
وقفنا بعدها ساكتين
نبص لبعض مش فاهمين
لكن قولنا:
-ما دايم إلا وجه الله،
وكل الخلق دول فانيين،
حنعمل ايه؟
ومديت ايدي أسند فيه
لقيت إيده دي سنداني
ومعرفناش
ده مين فينا
حيمشي في دفنة التاني؟
وبعديها
نصبنا صوان لبعضينا
شربنا القهوة فيه سادة
وعزيته… وعزاني
وبكَّيته… لحد ما دمعه بكَّاني
وكان الدمع بزيادة
ولما تعبنا قلنا خلاص
كفاية دموعنا، بزيادة
بنبكي لمين؟
لكن برضه
ما حدش منا انا وقلبي
قدر يعرف
ده مين فينا
بياخد في العزا على مين؟
#إسلام_سلامة
