لأنّه طيّب إلى الفقيد العزيز .. أحمد عبد العليم الخطيب .. الخطيب الطيب

لأنّه طيّب
سَكَن قُرَيّب
مِ الجرح دايما
عشان يِطَيِّب
والجرح آلْمُه
لكنّه عَالْمُه
دايس شوارعه
حافظ معالمُه
يُخشّ جرحك
يشد فرحك
يطلع لـ بَرّة …
يطرح شفايف
ترمي ابتسامة
لقلب خايف
فَ يبقى شايف
الدنيا وردي …
سُكّر مدوّب
لأنه طيّب
شايل همومه
جُوّة فْ هدومه
و يِقْضي يومه
ساكت و ساكن
فِ نَفسه لكن
بيحسّ دايما
الدنيا مركب
بتعوم لـ عومه
وترسى لمّا بإشارة يطلب
لأنه طيب
ما كانش عارف
بإنه سابح
فِ بحر جارف
بيداوي غيره
وجرحه نازف
ولا حد جاله
عشان يِطبّب
لأنه طيّب
وتد لسانه
رابط كلامه
شكواه لـ جوفه
و كل خوفه
عنيه تِبَيّن
فَ راح مغمّض
و فـ لحظة قرر إنه يغَيِّب
لأنّه طيّب
لأنّه طيّب

شعر: د/ أبو زيد بيومي