مبدعو مصر
شيل حمولك عن كتافي
—————————
عبدالناصر أبوبكر
—————————
لسّه روحك تايهه ف دروب المنافي ؟!
لسه قلبك ماشي فوق الشوك دا حافي ؟!
يعني كل اللي انت شفته ما كانش كافي ؟!
دي المعادله انت فيها مش طرف
والقصايد كلها سلوكها انحرف
والخلايق شايفه إنك شيء ترف
شايفه إنك ضيف شرف
شايفه إنك وهم
أو كائن خرافي
مش ضروري يعني تغضب أوتثور
مش ضروري الحرف يلبس توب طهاره
والعباره قبل ما تقيم الصلا للمعني
تتوضا بنور
دي الحكايه كلها بهتان وزور
يعني إيه حساس ميزانك
وانت خاطرك فيه كسور
يعني إيه الناس تساوي
بين غيابك والحضور
قول لقلبك لو يهاودك
يكفي ع الأحزان ماجور
واللا اقولك
إمشي غور
أوعى لما تشوفني قاعد
تبتسم وتقول عوافي
شيل حمولك عن كتافي
شيل حمولك عن كتافي