موقع إخبارى شامل

جنة ربنا في ارضه شعر : آلاء الهلالي

جنة ربنا في ارضه شعر : الاء الهلالي

يا كُل الكُل يا أصيلة
يا شايلة من الحمول أوزان
وخافية الهَمّ بالحيلة
كأن الوضع كله تمام!
في يوم عن يوم بتحمينا
عشان نفرح سنين قدام
بترمي الضحكة ل عنينا
وحاضنة ضلوعك الأحزان
يا شجرة فَرْح مخفية
وحلو ثِمارها فَرّ وبان
قَليل الشِعر في عينيكِ
ياست الناس وتاج راسي
يا كل الحلو في الدنيا
ومخزن كل احساسي
جبال الدنيا في عيوني
لا يمكن تبقى أضعافك
بتنسي الدنيا علشاننا
وشايلة الكُل بـ اكتافِك
ومين شافك…
ولسه يوماتي بتعافري
ولسه بترسميلنا كلام
يجيب اللمعة لـ عنينا
ولمعة عينك الغالية
دي بانت لمّا خَطّينا
مشينا الصالة طول بالعرض
يا جنّة ربنا في الأرض
عروقك ظاهرة بالقوة
ماجيتي في يوم وعريتي
خلايا الجسم من جوه
عشان ما تبانش أوجاعك
لا قولتي لحد يوم عيبة
ولا كرهتي اللي كان باعك..
بتِدي وتِدي مابتاخديش
وسايبة مع الجميع بقشيش
مافيش ولا مرة قافلة الشيش
وكرَمِك عمره مره ما قَلّ
يا أغلى مَحلّ
يقوله الكُل أسراره
كأن الدار بقى دارُه
عظيمة الدنيا وياكِ
دي روحي وهي شيفاكِ
خلاص خلصانة طلباتها
إيديكِ إن بس لَمَستني
فَـ روحي بينتهي عياطها
يا كل الكون
حياتي بوقفتك جنبي
لقيت بقى ليها طعم ولون
آلاء الهلالي
آرتين لتعليم اللغات • الجنّة ...جعلنا الله و جعلكم من أهلها : في رحاب الله

التعليقات مغلقة.