مبدعو مصر
بعد الرحيل)
مفتتح
شديت قلوع المركبه
وحاولت ابحر للغريق
مديت قلوعى للسما
واتارينى ضليت الطريق
(بعد الرحيل)
اخر ولد
طبطب
على القلب الغبى
كان قصده بس
يحط حبكه
للروايه المدهشه
ويسيب اثاره
المؤلمه
على قلبك الموجوع
ياست الحسن
من تقل البكا
ضحكة عينيكى
كات حقيقى طيبه
وانبل
من القلب الشقى
لكن بقا
اهو زى ما بيحكوا
نصيبك ف الهوى
واللى انكتب
ع القلب
لازم يوصله
احكى الحكايه
زى احسن
حد قالها
ف المدينه الفاضله
واوعاكى
يوم تتكلمى
عن طيف بكا
او كسر
بين خاطرك
وبين كل البشر
يمكن تحسى
ساعات كتير
نبض الحقيقه
بيخدعك
خبط الالم
بيهز روحك
بالقوى
ويشد انفاسك
لأقرب حد
ممكن يسمعك
لما انتى
مش حمل
انكسار الروح
وندر الاوليا
بتمدى ليه
عشمك قوى
ف الناس كده
الناس دى
اوجع م الوجع
ليه تسمحي لهم
ينصبولك محكمه
ويعلقوكى
من قصايدك كلها
ويعذبوا .. فيكى
البقايا الميته
ما تواجهى
روحك
بالحقيقه المخزيه
توب الفضيله
مش مقاسهم كلهم
وعشان
مايشتالوا الذنوب
عن ضهرهم
كنتى انتى
اول واحده
يرموكى بحجر
شوفتى القدر
واقفين بعيد
يتمصمصوا
ازاى ياعينى
يدق قلب البنت
ف السن الخطر
وازاى تموت
م العشق
ويروح قلبها
لبعيد قوى ….
من غير ماتتمرجح
ف مشنقة الغلط
انسى اللى فات
واتعلمى
ازاى تخطى
ميت كتاب
عن كدبهم
وعن براح
راح يتوجد
بعد الرحيل .
(السيرة الذاتيه)
الإسم :- شيماء محمد السعيد محمد جمعه الغيطى
الشهرة :-شيماء الغيطى
السن:- 43سنه
المؤهل:- ليسانس أداب قسم لغه إنجليزية ودبلوم الترجمه الفوريه
الجوائز :-
المركز الأول على مستوى الجمهوريه في مجال شعر العاميه المصرية مهرجان الشعراء الشبان التابع لوزارة الشباب والرياضه عام 2000
المركز الأول على مستوى إقليم شرق الدلتا الثقافي في مسابقة الفرع عام 2000مجال شعر العاميه المصرية
المركز الخامس على مستوى الجمهورية في المسابقة الثقافيه الفكرية مجال شعر العامية سنة2001-1999
النشر
صدر لها ديوانين
غمض عينيك واحلم بقا الفائز بالنشر الاقليمى سنة ٢٠٢٠ عن الهيئة العامه لقصور الثقافه اقليم شرق الدلتا
وديوان قصايد مش بريئة الفائز بالمركز الأول فى مسابقة اشرف بدير الادبيه عن فرع شعر العاميه سنة ٢٠٢١