بطعم الغِشاوة .. قصيدة بالعامية .. شعر الاء الهلالي
بطعم الغِشاوة .. قصيدة بالعامية .. شعر الاء الهلالي
واقفة روحك جوه مِحنة
بين دفاتر م النعيم
راكنة وبترسم عقابك
جوه كومة من الجحيم!
جايبة قدامك عَمايل
توبت عنها، حرقتها
حَطِتَك جوه الكآبة
خَلِّتَك تِسمع لها،
ورجعت باكي
الدموع!.. صعب إن تفيدك
كان زِمام الأمر فـِ ايدك
وأنت سيبته لحُكم قلبك في الشمال
لو حياتك كات في كفة
والميزان دلوقتي مال.!
حضرتك هتشيل خساير
ألف حَد بألف حال
حتى صاحبك أو حبيبك
كله بيسابق يسيبك
بَدَأْت الدنيا بالوِحدة
وهتودعها بيها كمان…
مافيش غيرك بيستهلك
في روحه عشان أخوه الإنسان
بتخسر ياما علشانهم
واديك مِتباع بلا أتمان..!
يا واد ياغريب في أطباعك
نسيت اللي أنت عيشته زمان؟
فَكَّر هيلقى في حد هيطبطب،
يسمع مشاكله يكونله ضهر ويسنِده
كل اللي جاله في وقتها
كان قَشة قاصدة تعَجِّزُه
فاتت ليالي بكل قسوة وتُقلها
من فرط حزنه اللحظة دي
بقى كل يوم يشتاقلها
رغم إنه كان شايف الحياة
مش ماشية صح ومُنصِفة
شاف إنه أشبه بالصِفة
توصف حياة الباقي مش هيَّ
حلوة وجميلة الطبع..مُغريَّة
كُل اللي زارها في لحظة لسه مُقيم
طبعك غشيم…
ساب الحياة صَبِّت همومها في ناحيته
علشان يسيب الباقي مِتهَنّي
#آلاء_الهلالي
قد يهمك أيضا
