الجواز .. قصيدة بالعامية للشاعر عبد الهادي الشعراوي

116
الجواز
بقى عملة نادرة
بين الشباب
والمعاملة والمهور
بقت هباب
العروسة تقول الشقه
لا بلاش
والاوض بليكار
من غير نقاش
والنجف والجود هديه
مع القماش
والشبكة لازم
تكون اساور
علشان الناس عليها
تقوم تشاور
والعريس الله يعينه
على اللى فيه
جيبه فضى انتهى
المال اللى فيه
بطل سجاير وابتدى
يوفر فلوس
وف يوم راح واشترى
اوضة الجلوس
وتانى يوم اشترى
النوم للعروس
واما الجهاز اصبح تمام
حددو كتب الكتاب
وف يوم قاعد ينبسط
بين لا صحاب
جاتله حماته يومها
وسألت عليه
طلع لها دا الجدع
مادد ايديه
سلم عليها وابتدى
يسأل فى ايه
قالت له شوف ياجدع
من غير كسوف
لازم تدبح فى الفرح
عجلين جاموس
اوع تقولى كفاية
واحد خروف
والله مايكفى عليتنا
مرة غموس
وتيجى بكرة تشترى
الجزمة والفستان
وطرحة بيضة مليانه
ترتر وستان
دا كله بكرة
خلاف البيبسى م الدكان
وتحجز لنا فرقة ورقاصة
وكمرة فيديو تظهرنا
على الشاشة
وتحجز لنا صاله
فيها بنوار
علشان ابويا واخواتى
والزوار
صدقنى يا ابنى واصرف
على الزفة
دا انا حماتك بحبك
وانت فى اللفه
سكت الجدع
ومد ايده فى جيبه
وقال منين
دا كله هجيبة
وطب ساكت الجدع
فى الحال
والصرخة عالية
م الحما موال
ضاع العريس
وضاعت الامال
وبقى الجواز مشكلة
لشبابنا الحالى
اللى النساء اصبحت
بالنسبة للرجال
نسبة عنوسة كبيرة
والسبب المال
…………………….
القروى الساخر
عبدالهادى الشعراوى

التعليقات مغلقة.

error: