موقع إخبارى شامل

إغسل روحك شعر : قوت القلوب .. الاسكندرية

إغسل روحك شعر : قوت القلوب .. الاسكندرية
هات من بطن الكدب حقيقه
واغسل روحك م التزييف
دانت برغم القوه ضعيف
وانت برغم التعليم جاهل
لسه ف قلب القلب مجاهل
صورتك لسه ما دخلتهاش
يعني مناطق زي الشاش
بيضا مافيهاش حاجه تلوثها
قلبي بعت دقه بتحرسها
تقدر لما تشوف ألاعيبك
وخيانتك أو غدرك تكره، تطرد
روحك بره الجنه..
وتحول معلومك نكره
ياللي ما جيبتش حاجه تفرح
وبتدبح أحلامي ف بكره
لو ما حاولتش تغسل زيفك
راح تدخل سرداب الذكري
مش رح تبقي يادوب غير فكره
جابها شيطان الحب وطارت
أو علي رف الذكري بضاعه
جت بخساره ف يوم واتباعت
أو ربما ما لقيتش زباين
فضلت لما الأخر بارت
وانا دقات قلبي اللي انهارت
قادره أدور تاني عليها
وأعيد ترتيبها ف شراييني
أكسر كهف الزيف الحجري
وادخل كهف جديد يحييني
أما ان كنت ح تغسل روحك
وأشوفك بالصدق تجيني
ح تشوف لحن القلب الصابح
غنوه عليك، بس تغنيني أو تلاقيني
شمس ونجمه ونسمه وورده
صوره جميله ف كارت معايده
وتلاقي الأشواق تكعيبه
والعنب اللي بيسكر طارح
والعصافير خدام بمراوح
وانت تكون..
ف القلب هارون.

 

قد تكون صورة ‏شخص واحد‏

قد يهمك أيضا

” سوق البِدَل ” شعر : ميمي عبد الجليل

وتعدى الايام  شعر : محمد السعيد

ابراهيم رضوان يكتب : بطل الخيانه

التعليقات مغلقة.