مبدعو مصر
لو عدَّى بتاع الروبابيكا شعر د / ابو زيد بيومي
فيه ناس ادّيتها من عمرك
وإن جيت للحق ما تستاهل
من عمرك يوم
فيه ميِّت ينفع يتعاتب؟!
أو ميِّت يرجع من موته
لو مهما تلوم؟!
افتح باب قلبك وارميهم
على أقرب كوم
لو عدى بتاع الروبابيكيا
اندهله يشيل
ياخد ببلاش … خليه ياخد
بالكوم والكيل
دا وشوش الناس الكدابة
مالية البدروم
واوعاك اتفاصل .. راح تجعل
ليهم مقدار
السوق مش قابلة غير تاخد
أرخص أسعار
السوق مش عاوز ة غير تسمع
كدب التجار
بيع كل بضاعة رخَّصها
زيف الأصحاب
بيع كل مشاعر رقَّصها
واحد كدّاب
السوق مليانة بجواري
مليانة عبيد
وما بين البايع والشاري
السعر يزيد
والكسر عشان ببلاش دايما
هوّ المطلوب
في السوق السودة .. ولا ينفع
غير المعطوب
طبلة و زمارة ولا يكسب
غير الطبال
زحمة عميان رايحة وجاية
بضمير غربال
اوعاك يوم تدخل وياهم
وتروح ع السوق
لا ف إيدك طبلة وزمارة
ولا تملك بوق
ما يفوت في الزفة الكدابة
غير المبروم
لو عدى بتاع الروبابيكيا
اندهله يشيل
دا وشوش الناس الكدابة
مالية البدروم
انت الكسبان لو يوم تصبح
صادق مظلوم
ـــــــــــــــــــــــــــــــــــــــ
#أبوزيد_بيومي
قد يهمك أيضا
مهرجان الحب والسلام السابع 2022 بمكتبة مصر العامةبالبحيرة اليوم
جاسر جمال الدين يكتب قصيدة جديدة من شعر العامية المصرية
موعد توزيع جوائز مسابقة صلاح هلال الادبية ومكان الاحتفالية