موسوعة شعراء العامية المصرية / الشاعر : معاوية المهدى

*؛*؛*؛*

و كنا زمان ..
بنصحى الصبح نتسحّب
و نفرك من عينينا النوم
و كله فـ إيده سنارته
و كام حتة عجين بالتوم
و كنا كمان
نجيب طعمية م السخنة
و حتة لفت ويّا العيش
عشان نفطر
و ياما زمان كمان دوخنا
عشان بنلاقي وسط الهيش
سمك أكتر
و كان القلب يتنطط
مع السفاريت و لمعتها
و ندعي يارب
و فيصل أخويا بيخطط
هناك في البيت لعلقتنا
في حفلة ضرب
و كنا زمان ما نزعلشي
و نركب تاني قطر الصيد
و لو علقتنا تذكرته
و نصحى الصبح نتسحب
و نفرك من عينينا النوم
واحشنا البحر و حجارته
و كنا عشان ما نتطمن
عشان الخطة تتأمن
بنصحى الصبح و نفنن
و نقنع فيصل العاقل
و بنظبط له سنارته
و كنا زمان
بنشعبط مع الأحلام
كانت أيااااام !!!

———————————–

ترياق
شعر : معاوية المهدي

*؛*؛*؛*

الشعر .. مش حبة كلام
و لا تهتهه و لا نهنهه و لا شحتفه

ولا قافية بالعافية ونظام
ولا زيزفون و لا أفلاطون الفلسفه

الشعر ممكن .. لو جرام
وسط الكلام ينعد تل ، و يبقى حل

دا الشعر بير عتيق وخام
مليان سموم بتبوح بأسرار الشفا !!