موسوعة شعراء العامية المصرية / الشاعر : مأمون الحجاجى

كان يجرى ايه
لو كنت كدبت روحك
كمان مرة ؟
ازاى مستنيها وهى البعيدة
ترمى روحها ف حضنك؟
وخدها كلمة ف ودنك
قلة البخت ليها
ف الدنيا دى أمارات
وانت اللى جاهل
ف معاملة الأميرات
وخجول بشدة
ف مواجهة الكاميرات
راجع نظرتك قبل ما تشوفها
سبع مرات
يابخل روحهم اللى كانوا
ف الدنيا دى فمرات
مستعجلين والوقت عدى وفات
وماشيين على مهلهم
يملو كتب الذكرى والاعترافات
بيعتبروا الوجد م الخرافات
يارب
لو كتبت لى حج بيتك المعمور
مليش غير دعوتين
من فوق جبل عرفات
لا تحرمنى اشوفها قبل ما اموت
واسمعها وهى بتنادينى باسمى
وبعديها اكون فى جملة الوفيات

كان ف الإيد وضاع

إيه اللى كان ف الإيد وضاع ؟
اللى كانو ا ف مقام الأنبيا
والأوليا
وطاهرين زى الملايكة
والصبح البرىء
بقيم وضاع
إيه اللى كان ف الإيد وضاع؟
وكل شيىء للبيع
من أتفه الأشياء ياناس
للبن الرضاع
ف لو فاضى؟
سلم لى ع الأحبة
اللى ناموا ف عز سهدى
اللى خانوا الليلة عهدى
واللى كانوا زى ديب… ربينه
قام كلنى لما جاع
ايه اللى كان ف الإيد وضاع ؟
الدنيا كانت بتلف بيا
وواقفه بيهم
أنا اللى كنت ف مقام نبيهم
كان نصيبى من الرسالة
خيبة الأمل والضياع
إيه اللى كان ف الإيد وضاع؟