من الشعر البدوي / ترفا في بدن للشاعر قدوره العجني
من الشعر البدوي / ترفا في بدن للشاعر قدوره العجني
ماطريت لهنْ = بنت أجواد ترفا في بدن ْ= لهن عامات
لهن عامات ماسمعن صياح = شلايا صمْ مدّن م المراح
وزرّارات ماليات الاقداح = وروّابات عالحفره ملنْ
هذاك صباح ياطيبك صباح = تعرّض هاك للاّفي عطنْ
ومخّاضات في وقت ضحْضاح = بهاك وهيت شكوتها تخنّ
وجار الجار والضيف استراح = شباعا ريْ من سمن ولبنْ
ومقرنْ نجع نازل في ركاح = خيوله جرد عالغازي عصنْ
بيوته عزْ رقّاد الارياح = ومالخطّار عمره ماخلنْ
وكلاب النجع ملّن مالنباح = والامواس ذابن مالمسنْ
وفيه أولاد كي قير الجباح = وحتى نساه نوفتّن خذنْ
وفيه شيوخ من بذرة صلاح = أن جيت يجوك باحسن ما تظنْ
وبنت أجواد تدبي في اسناح = بخيط شميط غازلته بفنْ
وتجيب سريب الأجواد الملاح = بمهاجاه عالغايب تحنْ
ويوم الظمي روح بالجناح = ذود تقول مزنه مندغنْ
وجوه تريس بياعة ارواح = ارووه بلطم عالمنهل عطنْ
وبرّك وقت نين الظل ماح = وعلْ ومدْ حيرانه اتدّنْ
عامد وطن فيه العطر فاح = خريف وصيف مرباعه قرنْ
ومعاها سيد واتي بالسلاح = بام احداش مالناس الفطنْ
ما من ريم متقحّزْ براح = مدْ عليه جاته ف القطنْ
ملاّ حكي غير اليوم راح = مثيل الفلم وقتنْ به حكنْ
الله الله وين الثلب طاح = والاوقات جيّدهن حرنْ
أولاده موّتو تحت النطاح = هذاك القرم واحفاده جلنْ
وتمّا البوم يغرد بالنواح = فالنزلات قاعد مستكنْ
فضل حتحات ينزف بالجراح = درسْ أجواد داخو ف الفتنْ
