ممنوع عليك تحلم تطير.. شعر: رجب لقي

ممنوع عليك تحلم تطير
أو ترسم الاحلام صور
أسراب حمام
اكسر شراعك انسفه
انسى الكلام
ممنوع عليك الزقزقه
أو حتى يبقى الصوت صدى
لهديل حمام
او ضحكة حلوة
بتفرحك حتى ف منام
يا طير حبيس من غير ونيس
ممنوع عليك لحظة سمر ويا الصحاب
أو حتى لما تشوف شعاع
تفتحله باب
ممنوع تداوى جراح تطيب
أو يوم يزورك طيف حبيب
ممنوع عليك الفضفضة
يا طير وعالق فى الفضا
ممنوع عليك المشتكا
يا طير ومخلوق للبكا
ممنوع عليك لحظة لقا
والضحكة معجونة ببكا
الدمعة صبحت بسمتك
ونهارك الملتاع انين
يا عمر ولى وانسرق
يا حلم مصنوع من ورق
الليل بيحكى لوعتك
موال شجن مهموم حزين
هتروح لمين وتقول يامين