ماليش غيرها.. قصيدة بالعامية للشاعر اسامه عبد العزيز

ماليش غيرها
تضيق الدنيا وبتوسع
بدمعة وضحكة من عينها
ويحلى العمر ويمَسّخ
مابين غابِت… وبين حَلِّت
عيوني اللي خلاص مَلِّت
وشايفة إن البنات واحد
شافتها النظرة دي اختَلِّت
وخَلِّت عقلي يتّاخِد
وفهم إن البنات صنفين
مابين هما وبين هما
لكن هي دي نوع نادر
ماهيش واحدة
دي تتفك ب200 أُمّة نبيذ فاخر
سليلة عز بيت ملكات
وذات شفّافة نورانية
ونظرة ورد بيفَتّح
فيصحى يبُصّ للسّموات
فتضحك لُه
وتحدِف لُه النّدا هديّة
فيترقّص مع الفراشات
وتبقى الدنيا أغنية
بدوب فيَّ وانا معاها
بحبّني موت
بحسّ الدُّنيا صالحتني
خدتني في حضنها راضيتني
وزرعت قلبي علشانها جناين توت
ملت لي جيوبي بالبهجة
فحبيتها بـ200 لهجة
ففرشت أرضي شوق وحنان
ببنت جنان مافيش منها
قصاد عينها بكون عيّل
رجعت أحبي
رجعت أضحك بملو الوش
بقت بتكش أحزاني
بقت معلش اللي بتطبطب على قلبي
بقت هِلبي في وقت التوهة والنّوّة
بقت جوا
وكل الخلق بقوا برا
بقت سكر يحلّي الدُّنيا لو مُرّة
مافيش مرَّة قصدتني فيها مالقتنيش
وفـ الأزمات
جناح أحلامي لو مقصوص
بتوهب له الدفا والرّيش
كما الشربات بمزمز فيه
مافيش إفيه ولو بتقوله 100مرة ماضحكنيش
خفيفة الدم مزيلة هم
ولو تتلم الصفات الحلوة في حكاية ماتوصفهاش
مُضاد والشاش مرطب للحياة منعش
وريح طيّب بتتطيّب بيه الجراح وتخف
بلف سجابر الدنيا ما تسطلنيش
يا دوبك صوتها يلمسني دماغي تلف
ماهي المجموع اللي عداني
وتنسيقي اللي ودّاني
وربّع قلبي في الفردوس
بتدي دروس
في علم الأصل والطيبة
صديقة وصاحبة وحبيبة
وعندي يقين مافوش ريبة
بإن برغم أنوثتها
بتملك أصل 100 مجدع
مافيش في الشدّة منها اجدع
إذا ميّلت تعدلني
اذا نسّلت تفتلني فاعود أقوى
عشان فعلا مافيش غيرها
تميمة الحظ والرقوة
وتحويجة زمن كيّبف
عمل لي دماغ مابتفوقشي
وما بيخلصش منها الكيف
مانيش حريف كتابة شعر
لكن جواهرجي بفهم سعر
وقيمة الأصلي والنادر
لذا تلقاني مش قادر
اغيب لو لحظة أو سنتي
بعيد عن طيفها واستغنى
ماكيف ابعد وانا بيها
انا الأقوى … انا الأغنى
لذلك بدعي للمولى
يعينّي ويحسم الجولة يحط حلول
وتبقى في حضني طول العمر
مكتّف قلبي تأثيرها
آمان على طول
عشان فعلا مالاقي كلام
غير اني اقول
ورب الكعبة واحداني ولازماني وغلبت أقول
ماليش غيرها….. ماليش غيرها