تروس الحظ ..قصيدة من شعر العامية المصرية شعر: عطوة حسن
بما إن الليل مالهوش أصحاب
والفجر يشتت تكوينه
وحروف الجر في أي كتاب
الحرف بيكسر تابعينه
والبحر اللي انت عامل له حساب
أمواجه بتلعن عاشقينه
والحب ماهوش واقف ع الباب
ولا حتى مشاعرك عايزينه
خليني اكتب لك نص عتاب
يدبح لك خوفك بأنينه
………………………..
يا اللي انت برئ رغم ذنوبك
وجراحك تدارى ف توبك
وبتضحك والخوف مكتوبك
ومالكش ف بكرة شعور واضح
والجاي من عمرك مش مضمون
إن كان هيكون زي الرايح
ولا المتخبي ف ضهر الغيب
احزان بتفوح ليها روايح
عمال بتعافر في الدنيا
والدنيا تعفّر في عيونك
والريح بتعاند في سفينتك
والعافية تميّل وتخونك
بتخاف الشمس تغيب منك
والليل يتحول مجنونك
يتمعشق حزنك ويطوّل
تسهر تتقلّب في شجونك
وبتكره من دايرة كونك
كونك مغصوب على اوجاعك
كل اللي دفعت سنين عمرك
علشان تلقاه أصلا باعك
ودراعك مش لاقي متاعك
وصراعك طواحين مهجورة
ألوانهم زاهية بتتكلّم
ولوحدك باهت في الصورة
أحزانهم سهل بتتلملم
لكن أحزانك معمورة
يا تروس الحظ المكسورة
الساقية خلاص ماعادتش تلِفْ
والطور متغمي ومش شايف
والبير سهّاه من مده وجفْ
عمال بيدُور علشان خايف
لا يقولوا عليه البيت الوقف
يا عمود مايشيلش لا حيط ولا سقف
مصبوب من قش وريش ومفيش
مصلوب من طوب مهري ومعطوب
مطحون في مطاحن أكل العيش
جلدك من خيش
لكن متداري ف توب ضحكة
مليان تناتيش
الدنيا بتضرب زعابيبها
خدّك متعود ع التلطيش
قررت تسلّم وتسيبها
وتروح وتعيش
والعمر بياخدك ويسافر
ويفتت فرحك بسنينه
تتخبى ف ليل مالهوش أصحاب
ولا فجر يفتت تكوينه
ولا حب يكون واقف ع الباب
ولا حتى مشاعرك عايزينه
