بنت بتوعد الضحكة.. شعر: ناصر محسب
…….
وفاضل من عنيها سؤال
وشارع يلضم الخطوه
وفاضل حلم
دايما بالوجع يقوى
وضحكه تزين العواميد
تاخدنا بعيد
كأنها لسه راجعه جديد من امبارح
وسايبه حرفها طارح على ملامحي
وفاضل م السنين صوره
وشمس على الورق بتصحي ف الحواديت
وبنت بتوعد الضحكه
تموت على خدها راضيه
أكيد فيه ميت سبب للفرح
أكيد الضربه دي قاضيه ف نفس الجرح
ف نفس مكانه
مها غيومها تتفرق
وتصبح ملح
ومهما دموعها تتبرأ وتحبسها ف تنهيده
مفيش احلام بتتحقق بدون ما بتعصى اوجاعها
وتتعلق بخيط لو حتى كان واهي ف يتبعها
وفاضل م الوجع دمعه
مين ف الحزن يمنعها
تفك شراعها
تتصدى ،
للموج اللي بقى طايش
ولسه للحياه هامش
مهما يضيق على حروفها
مدام فيه حلم لو على ضيئ ف عنيها هكون عايش
إرسال التعليق
يجب أنت تكون مسجل الدخول لتضيف تعليقاً.