يا بنتها ياللى ف عيونك سحرها.. قصيدة للشاعر / أشرف صديق
يا بنتها
ياللى ف عيونك سحرها
كان المقدّر ابقى ابوكى وقلبى يصبح عشّها
يا بنتها
ياللى فجمالك حُسنها
مين اللى قالك ان مامتك
فى الحُسن اُبدع زيّها
كام مرّة عنى اتكلمت
وان جيت فى بالها اتبسمت
وان مرّ طيفى فى المكان
شفتى ف عنيها حنين زمان
و قالت لك انى عشقتها
يا بنتها
زى الملايكه ف حبّها
لما تغنى الدنيا تعزف لحنها
و فوق جيبنها الكون بيرسم فرحها
والشمس تشّرق من عنيها وقلبها
يا بنتها
ياللى ف ملامحك وصفها
مين اللى قال لك ان مامتك
زىّ الملايكه ف حُبها
هى الملايكه تعرف تحبك حُبها
ولا الملايكه ف العشق تعشق عشقها
يا بنتها ياللى ف جمالك حُسنها
كان المقدر ابقى ابوكى
وقلبى يصبح عشّها
