مبدعو مصر
ولا تعاتب
………..
ولا تعاتب ..
حروف كدّابه بتنافق
ولا توافق ..
على اللي يقوله أهل الزيف
مافيش بعد النفاق تحريف
ولا بالكدب ييجي نهار
مافيش بين السما وانت
ببان مقفوله أو أسوار
ف حاول ف الحياه تختار
حروف الصدق عنوانها
تكون مفطومه ع الإخلاص
وحاول وانت وسط الناس
تكون غيرهم
حذاري تبوش ف ألوانهم
حذاري تضيع
مافيش أبدا خريف وربيع
بيتقابلوا ويتسامروا
مافيش صادقين بيتآمروا
على دبح النهار بالليل
مافيش تأويل
لحرف الكدب عنوانه
وغامق كل ألوانه
سوى إنّه من الشياطين
ما عادش ملايكه بني أدمين
عشان قلبك يصدّقهم
بلاش تسمع كلام منهم
ولمّا يقولوا ما تصدّقش
ح تسمع تلتميت معلش
بتيجي بتلتميت كدبه
ويفضل كدبهم لعبه
يعيشوا معاه ويتسلّوا
بياكلوا الكدب ويحلّوا
بكدب جديد على كيفهم
عشان يعدل مزاج كيفهم
ف كل دقيقه م الإدمان
دا بير مليان لكنه جعان
وكل يومين يعوز أكتر
بلاش تتغر ف المظهر
مدام جوّاك نهار أخضر
ياريت تقفل ببان قلبك
ولا تسمع كلام منهم
ولا تعاتب
سيد منير عطيه
عضو اتحاد كتاب مصر
من ديوان (عمود دخان )