وصلنا لنقطة العتمه.. شعر/ ناصر محسب
وصلنا لآخر الضحكه
وآخر سكه للعتمه اللي بتودي لكلاب الخلا
مفضلش شيئ غير شوارع تجري فيها الأسئله
ريحة فراق متأجله
بحكم الظروف
جثة رصيف شالت خطاوي العشق غصب
وفنجان قهوة مِتِيَتِم على الكورنيش
ولسه الجرح بسمِ اللي انتصر منقوش
كأنه ذنب
حل المعادله
لازم يموت الحب
وتفضل الذكرى جنين
قلبي محطة حزن
وحرب دايما تنتصر
مش مهم مين ضد مين
مين اللي هيفوز بالوجع
مين اللي قلبه بيتسع لقصيده منفيه
نفس الحروف هيه
بين صدقها وزورها
دلوقتي ليه بتشيخ على سطورها
وتسيب جمله عَرَضِيّه
شكرا للحظه بتحاول تستعيد نورها
وفيها ميت طعنه
حاجات كتير جوانا بتعيشنا لكن بدون معنى
وحاجات كتير بتموت وتمنعنا نلتقي ف نظره
وصلنا لدمعه نتمنى تكون قادره على خوفها
نسيب أحلامنا لما تموت
عشان احنا بننسفها بدون تبرير
وصلنا لنقطة العتمه اللي قِدِرِت تنتصر ع النور.
قد يهمك أيضا
موسوعة ادباء مصر.. كابتن غزالي
إرسال التعليق
يجب أنت تكون مسجل الدخول لتضيف تعليقاً.