موسوعة شعراء العاميه بمصر / الشاعر محمود رمضان

 

الشاعر فى سطور
عضو نادى الأدب بقصر ثقافة الزقازيق
عضو مجلس إدارة نادي الأدب وسكرتير النادي
عضو جمعية دار الأدباء
شارك بالمؤتمر العام لادباء مصر باسوان
المنسق العام لمهرجان الربيع الشعري دورتين متتاليتين التاسعة عشر والعشرون

 

الإصدارات الشعرية 1/دم مصري 2/شكل تاني 3/اناشيد الصمت 4/روحي فراشات بين حرفين ع السطر
محرر صحفي بجريدة الأجيال المصرية
محرر بمجلة مبدعو مصر
عضو جمعية مبدعى مصر المشهره برقم 2456 لسنة 2012
 تحت الطبع
أوبريت الارقام(للأطفال)
ديوان شعر عاميه حواديت البراءه و السماح

 

 

فُتّحَ المزاد

آلاأونا آلا دونا آلا  تري

فُتّحَ المزاد

بستان قديم

مين يشتريه ..؟

الزمن أهو عاف عليه

بس لسه ريحته فيه ..

مين ابتدي وفتح الكلام …؟

مين قال بكام ..؟!

بستان قديم

قديم صحيح

الشمس غابت من ملامحه

ومعدش فيه غير

ليل وريح

وعشان أكون أكتر صريح

الورد باستثناء البنفسج

أصبح جريح

الأرض سمدها النزيف

والسواقي العطشانين

مسكونه بالشبح المخيف

حتى الجنايني

بقي شكله يشبه للخريف

عجوز بينقل خطوته

ف سكة الحلم الضعيف

مين ابتدي وفتح الكلام ..؟

مين قال بكام ..؟!

***

الصمت خيم ع الجميع

الكل بيفكر في سره

حاجه عاف عليها الزمن

ح تساوي كام ..؟

ح تساوي كام ..؟

 

 

 

أنين الناي

8 مساءا

يوم وقفة عرفه

قاعده تقلب ف قزازة الميه

الحزن بلونه الباهت

كان نازل زي ستارة

علي جبهتها

راسم

تعاريج

العمر

اللي معدي التمانين

كانت قاعده كعادتها

علي عتبتها

تتحرك جواها سنين عديتها

فتصحي مشاهد لحياه

كانت ف الشقه

الشقه المليانه دلوقتي بوحدتها

كانت دايما تتهرب منها

وتروح تقعد بره البيت

وتفكر ف الدنيا

اللي سابتها

ف ولادها اللي زاروها من شهرين

كانت تتريق على حالها وحال الدنيا

وتقول لجيرانها

تلاقيهم نسيوا العنوان

تلاقيهم نسيوا انا فين ..!

كانت مرايتها بتوريها حاجات

مش عايزاها

لكن دايما كانت تمسكها

وتبص عينيها ف عينيها

كانت بتشوف نفسها طفله

وبترسم ف الورقة عروسه

ودواير تانيه كتيرة

هل هي الدنيا الملفوفه على بعضيها .؟

ولا دي التوهه اللي بتملي دلوقت عينيها

كانت ف النني

بيوت وشوارع

وستارة بتهفهف ع الشباك

بتنام تحتيّه

وتشد ستارته

 

اترك تعليقاً