مبدعو مصر
سيد منير عطيه سليمان
مواليد قرية العلوية – مركز الزقازيق – محافظة الشرقية
امين شرطة بالادارة العامة لشرطة ميناء القاهرة الجوي
شــاعر عاميه
عضو اتحاد كتاب مصر
عضوشعبة العاميه باتحادكتاب فرع الشرقية ومدن القناه وسيناء
عضو نادى ادب الزقازيق
عضو مجلة مبدعو مصــر
رئيس مجلس ادارة (مجلة رابطة عزف أقلام الـأدباء العرب الالكترونية )
رئيس مجلس ادارة رابطة عزف الـأقلام العربية
حاصل على العديد من التكريمات
نشرت بعض القصائد في الجرائد والمجلات
لقاءات ومداخلات تليفزيونية في قناة الحدث – قناة العاصمة- القناة الرابعة بالتلفزيون المصري
حضر العديد من المؤتمرات الثقافية جلابية مصر – مؤتمر الربيع
مهرجان القلم الحر بالمنوفية ثلاث سنوات متتالية
اغنية ( انت اللي اخترت ) غناها المطرب الشعبى صلاح مكاوي
الـأعمال التى نشرت :
– كل الحروف انتي
– منتهى اللذة
– سكران حب
– بستغربك
– على ورق الروح
– كرباج عذاب
– دقي يا مزيكا
– عمود دخان
الــأعمال التى لم تنشر :
– قلبي مجرم
– على نص سطر
– طعم القصيدة المستحيل
– توكيل احزان
– حاجات مجرمه
– فتافيت حروف
– سرسوب نهار
مانيش مجنون
……………..
مانيش مجنون
عشان اكسر ف يوم نفسي
واجافي الروح
وعمري ما كنت شئ مسموح
سوى للي عشقها القلب
أنا المكتوب ف كشف ميلاد
ح اعيش الدنيا رمز الحب
و ح امشي ف كل سكّه ودرب
أغذّي مشاعري بالأشواق
واسد الباب قصاد الريح
م انا الحضن اللي كان مأوى
ف عز البرد للمجاريح
وانا الرافع رايات الحب
على ضهر القصايد نور
ساعات تلميح
ساعات تصريح
ولو ف قصيده شوفت الأه
باقع فوق القصيده طريح
وارش دموعي ع الأوراق
تبوش الأه
عشان وقت الغرام نحياه
بدون أوجاع
ولا أحزان
ولا حتى مكان للنوح
واعود اشرب كاسات الشوق
وادوق تاني حلاوة البوح
ف يبقى ازاي ح اجافي الروح ؟
ويبقى ازاي ..
رح اهدم صرح جوّايا
معايا ف مبتدى التكوين ؟
مافيش عاقل ف يوم يرضى
يعيش الموت مع العايشين
ولا يقبل يشيل نبضُه
ويزرع ف الوريد سكاكين
ولو شوفتينا متخاصمين
أكيد يبقى عشان حبي
صبح بركان
وانا ف دنيا البشر إنسان
ماليش قدره على البراكين
ويبقى خصامي له سببين
سبب أوّل
خاصمتك لجل شئ حاصل
وقلبي أكيد ما يقبلهوش
سبب تاني
تشوفي إيه جرى منّك
وتعتذري وما تعمليهوش
د انا حبّي ماهوش مغشوش
ولا مرشوش بلون عيره
هوايا مالوهش تسعيره
ف حافظي عليه
بكل مافيكي من إحساس
ومن دقّات
خصامي كان يادوب علامات
وترتيب ل اللقا الأكبر
يا تيجي بقلب مستغفر
يا تبقي كسرتي بإيديكي
معاني العشق
ساعتها الشمس رح تنشق
وترمي جليد
وقمر الليل نيرانه تقيد
وتبقى الحاله مقلوبه
شهور الحب مش طوبه
بلاش فهمِك يكون ع القد
بلاش ترمي الدفا للبرد
عشان لو دوقتي هجراني
وكان فعلا جفايا بجد
ح تلقي بحور من الأحزان
وأمواج من جبال الصد
ولو صرح الغرام اتهد
ف يبقى اللوم على نفسك
وقلبك بكره ح يخاصمك
لكن قلبي ..
ح يفضل برضه باب مفتوح
م انا يا حبيبتي مش مجنون
عشان اكسر ف يوم نفسي
واجافي الروح
سيد منيرعطيه
من ديوان (توكيل احزان )