الشاعر شوقى عبد الوهاب
عضو نادى الادب بالاسماعيليه
عضو اتحاد كتاب مصر
عضو جمعية مبدعو مصر الادبيه
صدر له
انتى وجمالك نبراس للاعلام والنشر
2 نقوش على جدار السكات الهيئه العامه لقصور الثقافه
3 بيطلع ف الروح ابو طالب لنشر والاعلان
4 لسه الحواديت ما بتخلصش
5 كتاب الحبر والاسمنت الهيئه العامه لقصور الثقافه
6 اتهجى الحلم ف حروفك مؤسسة يسطرون
له تحت الطبع
وش الدنيا
بالهيئه العامه للكتاب
……………………………………..
كراكيب
—–
شال الزمان كل الكراكيب
ورماها ف الاوضه العاتمه
مع كل افلامه الصامته
وقفل الدواليب
لما القديم هد مكانه بعد ماخوخ
ماهو بعد مااترمم شرخ
ماهو كل شئ منظره بوخ
والناس بتخاف م الكراكيب
لم العزال والطبليه
وكل كتب الحريه
والوالى وكل السلاطين
ومنعوا لبس الجلابيه
وشيخ الزاويه قفلها ونام
ولم م الميضه القباقيب
لم الزمان كسوة مكه
وولع البترول فجاءه
ودا كله من اول حكه
وفضحوا ع الناس المحاسيب
وقالوا ع المرشد سكه
وغرقت الدنيا فى عكه
اما الغنم ف اكلها الديب
وانتى مصدره برضه الطرشه
ولسه بتهدى الفرشه
وعامله قمع ونسيانى
ورجع كلام بيرم تانى
واحنا بندور ع العيب
ماعدش فى نكته تكيف
وخلاص ماعدناش بنصيف
من تانى اتخدل ذندى
وكأننا فى ايام غاندى
وكل احلامنا ف تشطيب
طلعنا م الشق ف طوابير
وقولنا مش هانعيش طراطير
واتارى الفساد ابن لواندى
هو اللى خدل يوم ذندى
عمال بيضربنا بمراكيب
ساعات نقول سردى ماردى
انت حكيم ولا تمرجى
ومعدش ف كلام من عندى
وهو كله ايام بتعدى
وعشان تعيش الايام دى
لازم تكون واحد لعيب
وتلم من تانى الكراكيب
اعداد
محمد عبد القوى حسن
mobd3o.com@gmail.com
يشرفنا زيارتكم واعجابكم بصفحتنا على الفيس اضغط هنا للاعجاب بصفحة مبدعو مصر