من حكايات الزمن الجميل ١٣ محمد العجل ( ١ ) للكاتب: نعيم الاسيوطي
بعد أذن حبايبي هرجع معاكم لعام ١٩٧٤ يوم ما تقدم ابن عمي محمد العجل لخطبة أختي الكبيرة.. وقتها كان فيه حد متكلم عليها.. وأبويا وجدي كانوا موافقين بعد ما سألوا عليه وعلى عيلته.. واتفق ابويا وجدي محمد حميد على قراية الفاتحه بعد صلاة الجمعه الجايه مع عيلة ولد الحاج فرحات.. وصادف أيامها كنا بنكبس تبن القمح اللي في جرن زرعتنا اللي في الطين الجديد..
ويومها ولد فرحات راح معانا الغيط علشان يساعدنا في كبس فرادي التبن اللي من الليف.. اتأخرنا في الغيط لحد نص الليل.. وحسينا بالجوع والتعب.. وشويه ولقينا عمي الحاج علي يحيي جارنا في الغيط.. جايب لينا عيش وجبنه خضراء وعجور وكام حبة طماطم ..
قعدنا نأكل إحنا التلاته لحد ما شبعنا وحبسنا بشاي من الكانون.. وفاكر اسم باكو الشاي الشيخ الشريب.. وعلى الباكو صورة راجل تشبه صورة ملك في لبس زمان.. وبعدها ركبت أنا وأبويا الحماره ومشي ورانا يحرسنا ولد الحاج فرحات.. الصراحه كان إنسان طيب ومحترم وراجل ومن عيله كويسه.. وعدينا من نخل الطين الجديد اللي كله عفاريت وبلاوي سوده من جرايم القتل اللي كانت بتحصل فيه لحد ما وصلنا البيت..
ويدوب نمنا شويه والفجر أدن.. وراح أبويا يصلي الفجر في جامع الخطبة وراء الشيخ محفوظ الخطيب.. وأمام الجمعة واللي له صوت مميز وقوي وكمان فاهم في الدين كويس.. وليه علاقات مع ناس كتيره قوي في اسيوط وبره أسيوط.. وأي حد كان يقصده في خدمه كان يقوله حاضر من عنيا الاتنين يا ابن العم أو يا ابن الخال.. وأنا كنت بحبه وبحب الشيخ محمد عبده اللي بنى مسجد الرضوان بعد رؤيه شافها في المنام.. وفي اليوم ده اتقابل أبويا مع عمي الحاج ابراهيم العجل وقاله:
– أزاي يا علي توافق تدخل حد غريب على بناتنا.. يا ابو العم بناتنا لينا ومعندناش فدار لحد.. ودا سلو وتقاليد عيلتنا وبتك الكبيره لولدي محمد اللي خلص دبلوم التجارة.. ومش هيحصل غير كده وانا أكبر منك وهقول الكلام ده في مجلس العيله.
رد عليه أبويا:
– يا ابو العم إحنا يدوب اتعرفنا على الشخص ومحصلش حاجه.. صحيح هو راح معانا الغيط يساعدنا في كبس التبن.. ومدخلش بيتنا ولا شرب ميتنا واللي انت شايفه يا حاج ابراهيم يتنفذ والبت بتك والواد ولدنا.
ورجع أبويا من الجامع ونادى أمي وقالها قبل ما تحلب الجاموسه:
– الحاج ابراهيم عايز البت لولده محمد. ردت امي وقالت لأبويا:
– محمد انا مربياه مع أمه الحاجه روحيه يعني زي ولادي.
ضحك أبويا وقال لأمي:
– يعني يا ست الدار موافقه على خطوبة محمد لبتك.
ضحكت امي وقالت:
– وأحنا هنلاقي أفضل منه.
وضحك أبويا وأمي.. وبعد شويه نادت عليا أمي كالعاده علشان أشرب اللبن من بز الجاموسة.. وهي بتضحك وبتقول:
– اختك يا واد يا نعيم هتتخطب لمحمد واد عمك.
أنا ضحكت.. وصبتني أمي على دماغي علشان أقوم من تحت ضرة الجاموسة وانا مبسوط.. ورحت أغسل وشي علشان أروح المدرسه.. وبعد صلاة الضهر قابل ابويا ولد الحاج فرحات ورضاه بكلمتين وإن الجواز قسمه ونصيب.. وبعد صلاة العصر جانا عمي ابراهيم وولده محمد وناس تانيه من العيله.. وقروا فاتحة أختي وتاني يوم راحوا جابوا حتة الدهب على كد الحال.. وبدأ محمد يساعد أبويا في الغيط والبيت..
وربنا كرمه ودخل معهد الصرافه في اسيوط.. وبعد ما خلص الدراسة اتعين علطول في بني عليج.. وفي البيت فرحانين إن لينا اخ كبير مش جوز أختنا.. وبدأ محمد يسألني عي دروسي في المدرسه وبالذات الإنجليزي اللي كنت بكره بسبب مدرسة الإنجليزي الطرمه.. اللي ياما ضربت الفصل كله في تسميع الكلمات.. والسبب بتفهم من حركة الشفايف..
وجبت شهادة شهر ديسمبر وفيها كحكه في الانجليزي زي باقي الشهور.. وابويا رفض يمضي على الشهاده وعطاها لمحمد العجل وقاله منك ليه.. حاول تقريه يا محمد وتعلمه الانجليزي.. وعمنا ما صدق كل يوم نطلع إحنا الاتنين فوق السطوح ويسألني وطبعا انا كتير بغلط ويضربني بالعصايه.. واختي فرحانه ان خطيبها بيعلم اخوها.. وبدأت أهرب منه في الشوارع ومش عايز اقعد معاه.. علشان حسيت انه بيعمل كده قدام أختي علشان يبين انه راجل وحاجات تانيه كتير..
وكل يوم يلف ورايا في الشوارع لحد ما يمسكني ويرجع بيا البيت ونبدأ الحصه والضرب أكتر لاني كنت بقطع نفسه في الجري ورايا.. وخلاني كرهت اكتر ماده في حياتي الإنجليزي.. هو في البيت والابله الطرمه في المدرسه.. وفي يوم أبويا تعب وجاله عرق النسا.. ورقد أبويا في البيت شهور وابويا على مصطبه من الطوب والطين وفوقها مفرش من القماش القديم.. وبصراحه محمد العجل يرجع من الشغل يشوف مصالحنا ويقعد تحت رجلين أبويا.. وفي الفجر ناخد الحماره أنا وهو ونروح نجيب برسيم من غيط الطين الجديد.. واستمر الحال ونجحت في المدرسه واجوز بعد فتره محمد من أختي وفضل محمد اخونا الكبير وواد عمنا الغالي اللي حبيته بجد واتعلمت منه كتير في حياتي.
( توفى زوج أختي في فبراير ٢٠٢٤.. ربنا يرحمه ويغفر له ويسكنه فسيح جناته )
اقرأ المزيد:
