مبدعو مصر
بكره اللي جاى دا أكيد
له ريحه ف امبارح
وفيه كلام يتقال
قد يتفهم جارح
والرك ع النيه
وانا سيد ابوها المسأله ديه
مييت مالييش ديه
طبع السماح عندي
خلاني زى الطير
وب اهون قوى ع الغير
وامشي ف آخر الليل وحداني
أنا ليا مين غيرى ؟
فى وقت النوم يهدهدني يهددنى ..
وانا اللي طول الليل ببات سهران
ورديه بعد الشقا باشتغل شارح
للفرق بين المعنى والمعنى
والفرق بين بكرايا وامبارح
وانا كنت باقصد إيه..
وهو يقصد ايه ..
أنا كل ليله كده بهرى فى جوايا
ضميرى يوجعنى
يمسكنى من قبى
يرزعنى فى مرايه
يسأل .. وارد عليه
يشتم ولا اسأل فيه
وإذا اختلفنا ف شىء
يجيب زكيبة اليوم
يفرشها قدامى
ويزيح ستاير النوم
ويزق أحلامي
قامت قيامتك قوم
أوقفلى من قدام
ما انتاشي نفس الطفل
يسند دماغه .. ينام
فطرت إيه الصبح ؟
والضهر روحت لفين ؟
وأما فتحت النت .. زرت صفحة مين ؟
أنا كل ليله كده .. والبشر أنواع
فيه اللي بعد القرص يدّيها
فيه اللي غاوي صداع
وعشان كده
باعمل للنومه ألف حساب
يشهد علىّ
حتى مفتاح كالون الباب
بسايسه فى السكه
وبوزع السلامات
ع الحر والسكه
وان عجله خبطتني
برشتنى فى الشارع
باجيبها م الآخر
وافتح لها سكه
واكتم وجيعتي فيا واتاخر.