مطلوب قلم بقلم / شعر : مروة أشرف

مطلوب قلم

يوصف بشاعة حضرتك

وازاى وليه

تبقى الخيانه ف دنيتك

بارع اوى ف الكدب

وازاى ميشوفوش

كل اللى داخل جنتك مابترحموش

سايب حقيقتك فوق رفوفك

ع المشاع والبث كان حصرى .

والكل ذاع

بس الحقيقه أنها مابنتش ليا

ولا للضحيه…….. كان التمن

إن الأمل جوا العيون أصبح ألم. …….

والكل شاف

جلاد وقاضى بيحترم أصل العيون

رغم الأسى مليانه زيف

وضحيته غرقانه نوم مع كدبها

وإن جت تحس أن الحياه مش ملكها

ترجع وتفرض سيطرة على حلمها

رغم الأسي والقوه اللى ف حضرتك

بشفق عليك………….؟

علشان معشتش زيها

اجمل معانى الحب

بالرغم انها

متغمسه بدموع حبيبته ودمها

طب بص فوق ارفع عيونك للسما

يمكن تحس ف يوم بضعفك ..

جنب قوة ربنا

مطلوب قلم. ……

مليان بدم السهرانين المشتاقين

يكتب حكاوى حبنا

من كام سنه

وأنا عايشه جوا الوهم عايمه

غرقانه ايوة

انا كنت نايمه

وصحيت لقيت

سكينه تلمه بتجز قلبى اللى اتظلم

مطلوب قلم

يكتب عن الحلم اللى كان

اقربلى من فرح الزمان

على قلب نفسه ف الأمان

على عين من الدمع اتعمت

مطلوب قلم يكتبلى وصفه للنجاه

ويقولى فين الأتجاه

وأدعى وأسجد للإله

انك تدوق طعم الألم

وتحس جرح اللى اتظلم

اترك تعليقاً