مبدعو مصر
مش نجاشي ..!! شعر : حمدي حسين .. الي روح الشاعر عبدالله صبري
مش نجاشي ..!!
………………….
ياللي صوتك هو صوتي
يفرق إيه موتك وموتي ..؟
اسمك انت اللي اتنده
واسمي انا لساه ما جاشي
وفي النهاية كله … كله ..
كله ماشي ..
سوق بلدنا ..
خير بلدنا ..
حتى مستقبل ولادنا
اللي مأمول منا فيهم
واللي فاضل فينا ليهم
حتي نيل البحر ماشي
شعرنا سماه ” نجاشي ” .
واللي واجع قلبي بعدك
إن وعدي هو وعدك
وإن ساعتي زي ساعتك
عشنا طول العمر نكتب
غيرنا عاش العمر يكدب.
هو يكدب واحنا نكتب
وٱخر المشوار .. رجعنا
هو قاعد وأنت ماشي
زي ما روحناها جينا .
اتهرينا ..
وأحنا شايلين فوق كتافنا
كل ما كتبنا وقرينا .
اتبرينا ..
عمرنا واتهد طوله
ومن ظهوره ليوم أفوله
حلمنا كان نازي فاشي
دربنا كالعادة واشي
واتنست نقطة وصوله
واللي قادر بس أقوله
بادعي ليا وليك لربي
بالسعادة .
البقاء لله يا صاحبي ..
في اللي قاعد ..
واللي ماشي .
…………..
شعر : حمدي حسين
إلى روح الشاعر الكبير جدا ..عبدالله صبري