مبدعو مصر
كإني
كإني عارفك من سنين
وباحس فيك طعم الّلقا
لما كلامك….
يترسم لى…..
ناى نهايته….
ليل …… يا عين
أسرح فى ألحانك صبا
فتاخدني للزمن الجميل
اللي ابتسم
جوّة عنيكي الطيّبين
ياطي …..بين
فرّق مابين البين
…..بينين
بيني وبين عمري اللي فات
آه م السنين !!!…..
لما يدور الماضي فيها ويتحكي
في نهاية العمر الحزين
….في دمعتين
بيني وبين لحظة ميلادك
حلم راجع يبتسم بعد الموات
جوّايا زحمة ذكريات
جايّـة ترجع
عمر فات
ياريتني طير
وانا كنت اطير
أوصل لجنّة حلمنا
ألـمّ حبات المطر
…..مطر الحياة!!
أروي أيام الصّبا
يمكن……تعود
حتي ولو ألحان في عود
لكني عارفها السنين
لما بتطمع فى الحياة
وخلاص هتوصل دفِّتَـك
……بـرّ النجاة
تلقى الخريف
واقف…على البر المخيف
يا حلم راجع يبتسم
بعد الموات
جوايا زحمة ذكريات
شووووف كام شريط
ياخد حكاية عمر عشته
زى النهار لما يروَّح
…………..منسكات
ولإنى حاسس إنى عارفك من سنين
سايبك أنا فى الذكريات
سايبك أنا …..
فى الذكريات.
