قصيدة للشاعر مصطفي الجارحي من شعر العامية المصرية
إحلق دقنك
سرّح شعرك
حُط كريم
أو زيت.. فازلين
خلّيه يلمع زي الفضّة ورا البتارين
إلبس أشيك
إتبرفن واظبط تون مشيَك
روح الندوة وحاذر وشّك يبقى حزين
اِضحك مرّة
اتبسّم مرّة
وانسى القصة البايخة المُرّة
روحك حُرّة وليك جناحين
قوم واتحرّك
إهمس زعّق غنّي فـ سرّك
إنت لوحدك يمكن أجمل
يمكن أوحش
يمكن أكمل حتى ان كنت ماعدت اتنين
اقعد في الكافتيريا شويّة
واتفرج ع الناس القاعدة
الناس الماشية الناس الجايّة
شوف كام بنت خدتها عنيك
مين فيهم بتبص عليك
وسّع قلبك خليه مرّة يكون ببابين
اِطلب شايَك يبقى تقيل
تُقل الهجر.. الغدر.. الليل
زوّد سُكّر مش هيضر
ما انت كفاية عليك المُر
إرمي عينيك علطول قدّامك
عيش الباقي من أيامك
دوس الماضي وانسى آلامك
إوعى يشدّك تاني حنين (!)
قد يهمك أيضا:
إرسال التعليق
يجب أنت تكون مسجل الدخول لتضيف تعليقاً.