قصيدة المسبحة.. للشاعر: تيام الشافعي

من ديوان ” ضريح الشوق ” الصادر عام ٢٠١٦
” المسبحة ”
خَبـْـطَك على أبواب السما
مسموع في قلب المُعجزات..
أدِّف وخطـِّي الأمكنة
الصرح كلُّـه تجليات..
إنسى البشر تعرف تشوف
السبحه في غصُون الرضا
هايمه تطوف..
مِـن فُــوق نجوم
دايره توزَّع ذِكرها على كل آيات المِحَن..
حالفه تزيـِّـن عشقها
ببواقي من ريحة الضريح
شوف الضيا
هاتلاقي فيه الأجوبة لقلبي الطــريح
مش قادر إنّي أوجِّـهك
أو أفهِّـمك صوت الخشوع..
الأوليا حوالينا أهُــم
بيجـمَّـعوا فـ نبض الربيع
وبيلمسوا طِـيْـب التداوي الـمُـستنير..
عِشقَـك هِنا
بيرتّل الآيات مطر
يِنْزِل في قلب المحرومين
شايف
وريدك
في السما
إزاي بينزف مخلـَـصين ؟!
سامع تسابيح السنين
بتنز محراب النجاة
ادخُل ونادي جوّا شجرة منتهاه..
هاتلاقي فرط النـَـدى
جوا الحَشا بيـْسـَـبـّـح الأوتار
شايفك شريد التجلّي
وبتبتسم أسرار..
هايم في روح الفضفضة والذِكر..
غـرْقان بطيف الحرم
والمغفرة
والبوح..
حَبّـات جبينك مسبحة صَندل
تايهه بـتِـسْـبَـح في بحور الليل
بتجـوِّد النور مـ الخشوع
وتلف حبل الويل..
بتقوم تــُـقـَـف للآية
وبتفتكر إنجيل.. توراة حياتك في الخَــلا دمعة
تنزل في قلب الصُفَّــة ع الأوجاع..
تقدر تطوف دلوقت جوّا البيت
شوف القلوب ..!
مخلوقة مـ الفاتحة
حتى الجدار
نبـِّـت من الواقعة..
اسمع بقا
واسمح هنا..
واسبــح تشـــوف..
السبحه في غصون الرضا
هايمه تطوف
مِـد الإيدين
واتوضّا جوا نيـِّـتك بالنور..
شـُـق الخطاوي
واقطف ثمار الغصون
واترُك
خشوع الشجر راكـــع
وبـيـردِّد ” وَالتِّينِ وَالزَّيْتُونِ ”
#تيامـالشافعي

اقرأ المزيد:

عاش الاستاذ شعر: محمد عبد القوي حسن