عتريس مابيحبش فؤاده .. شعر : نبيل مصيلحي
عتريس دخانه في كل حته
في الشوارع والحواري والأزقه والبيوت
الأوض مليانه ريحته
عتريس في ملس الصبيه
جوه كم الجلابيه
في العبايه
تحت أغوار الطاقيه
عتريس بيجري في العروق
بعبع يخافه كل سكان الوسيه
كابش قلوب كل البشر
عتريس ما بيحبش فؤاده
بس عايز كل ما فيها لجنابه
يأمر وينهي في عيالها
اللى زارعين الغيطان
إللي دايرين المصانع
الشقيانين العرقانين
والعرق صبار بيرويهم أمل
يا فؤاده كنتي أسطورة زمانك
كات سطوتك تطوى النمارده
والفراعنه الدجالين
والسامري
الأرض عطشت يا فؤاده وشققت
والغله في ايدين الخواجه
والخواجه ابن اللذينه ما عدش يمنحنا الجزر
ما بقاش في ايده غير عصا
يا فؤاده الأرض أرضك مهما حط الليل عليها
مهما ينهب من عيونك عمر ما يصيبك عمى
مهما لم شرور زمانه والوجود
عتريس كما عواد زمان نفس الحكايه
إنتي قادره تحرقيهم توجعيهم
انفضي همك وقومي صحي ابنك
صحصحي وقوليها لأ
لكل عتريس جاي يدوسك
تلقي صبحك عاد ينور في جبينك
—
نبيل مصيلحي
