عايزة…. إيه؟.. شعر/ جيهان النجار 

عايزة… اخرج
والخروج مش
م المكان
الخروج م الخوف وفقدان الاتزان
قلبي ساكن حتة ضلمة
حتة مفيهاش ناس ولا فيها أمان
حتة فيها الفكرة ضالة… والأمل عيان بعلة
والقلق والحزن لموا وعملوا شلة
ومنعوا أى نهار يفوت
عايزة.. اخرج م السكوت … اللسان قرب يصدى
والكلام مبقاش معدي…..وتحت عين الحلم عشش عنكبوت
عايزة.. اعيش أحاسيس جديدة
روحي، مبقاش فيها حاجة…
والجوارح
ع الحديدة …
والمشاعر واقفة تقريبا وحيدة
والقمر قرب يموت
عايزة.. اخرج م التعود والكسل والنوم وازود
سرعة الروح والحياة
عايزة.. اصلي كل أنواع الصلاة
ع اللي غايب
واللي تاه
واللي عطشان للمحبة
عايزة.. اسافر……
م القلق قلبي مقرقض ف الضوافر …
منتظر شيء ماعرفوش
متُ يجى ألف مرة وسط ناس مابيفهموش
عايزة.. اقابل خلق مش نفس الوشوش
عايزة.. احب ومرة تكمل
هيه ليه قصص المشاعر كلها دايما فاشوش ؟
ليه الهوى راضي بعذابه لا اعترض
ولا بان له صوت
عايزة.. أشعر بانتصار
كل إحساس عدى فيا… إلا ليا عنده تار
دا اللغة بجلال حروفها بتعاملني باختصار
الصور داخل عيوني….بيلوموني
عايزة.. تغيير النهار