” سوق البِدَل ” شعر : ميمي عبد الجليل
” سوق البِدَل ”
………………..
فيه ناس تِبَدِل
في البِدَل
وناس بتلبسها
البدل
وناس كتير لو عريانين
عمرك ما تلقي لهم ..
بَدَل !
فيه بدلة لونها
بيعجبك
وبدلة تانيه
بتجذبك
وقماش كتير لو تلمسه
يحرق ايديك ..
ويدوبك !
فيه ناس بتلبس
بالمقاس
وناس بتاخد
بالمداس
وناس تبيعك بالرخيص
عشان جنيه
زاد ف الميراث !
ماهو سوق بِدَل
راجل ..تليق البدلة بيه
واحد ..مقاسها كبير عليه
وتلاقي أب وباع ضناه
علشان (م ……. ة)
ضِحكِت عليه !!
مش كل واحد جاب قماش
فَصَل ..لِبِس..
بقي اسمه “بِيه ”
ده فيه كتير لبسوا الحرير
ولِسَه عِرق الندل فيه
وفيه رجال لو شفتهم
تتمنى نظرة
من عنيه !
ماهو سوق بدل
قالوا الرجولة
مش كلام
ولا لبس وشوية
عطور
ولا كل من عاش
في الحرام
كَفَر ذنوبه بعود
بخور
ولا كل من زارأوليا
هيشوف بدال الضلمة
نور
ده فيه رجال يتكلموا
بيخلوا كل الكون ..
يدور !
يدخل ويكتب
في الحديث
قال عامل انه
شيخ طُرُق
ويعيش عليك دور
الشريف
و كأنه قال …
نجم وبَرَق
تحسب جنابه واد
نضيف
أتاريه ..مع الحلوين ..
غَرَق !
أصل الرجوله
مش بدل
ما تخدش بالمنظر كتير
ولا مين ومين
لبس البدل
ومتعاشرش ف يوم
بخيل
كَنِّز عشان يوم
يِتعَدل
صاحب بأخلاقك أصيل
ياخد ايديك لو يوم
تميل
لو لابس البدلة
بعَرَق !❣
افهم بقي ..
مش كل واحد جاب قماش
يفهم ف لبسه
للبدل !!!
ميمى عبدالجليل
الثلاثاء 22/11/2022
قد يهمك أيصا
