سهراية الخاينين / شعر : محمد عبد القوى حسن

 

سهراية الخاينين

شعر : محمد عبد القوى حسن

————————

 

كل اللى كان فى البحر

مايجيش على قد هواك

وانا كنت واقف

عند حافة جهنم

تحت سطح الانتهاء م الكون

كانت بهيه بتحصد

زرع غيط الخونه فى امشير

زعابير بترمح فى كتاف الليل

ضى النهار نعسان

على ياقة قميصى

والبنت مخفيه فى عتمة ويل ومصير

مين اللى غرب مهجتك فى الوقت

مين اللى دبح العصفورين ع الجريد

نازل السعف من نهر دم العمر

هفهف عليك الحزن

واخدك قوى بالحضن

مين يكتبك للصحبه ساعة صفا

 فى حضرة جميع الاوليا

فى السيده زينب

مين يسرقك من عيالك

ومين اللى لون قطن جولدمائير

مين اللى حمص قلب امى

وهى لسه بكر

مين يندهك تعاويز

مين فرفطك فى رحلة الابريز

مين وحدك فى الجوع

مهدود عمود بتاوك المتنى

مرويه حيطك من عطانة عملة الانجليز

السكه مطليه بصداع العصر

كل النخيل بيئن

كل الشجر ماعادش قادر يحن

لقعدة الفقرا

وحكايات سيدنا الخضر

فى العتمه طالعه الجيوش

ولا حد باح بالسر

ماتوحدوش النميمه

ماتوحدوش السل

فى درب خان الجميع

فى درب خان الكل

ماتحرروش الديابه

من جحور الشرق

الغرب ضرب فى قفا

والشرق باع الوفا

والبحر بيراود حوت بينهش فيك

بيتك عشتك

فرنك غربتك

سهراية الخاينين

وسيفك المتنى

وسيوف الخشب طوابير

اضرب ماتضربش

الضرب كله للورا

والطلقه راجعه عليك

ووابور الساعه اتناشر

لسه ماجاش م الصعيد

 

اترك تعليقاً