ذكريات / شعر : محمد البنا

ذكريات
آه من ظلم الزمن القاسي
يعمل ناسي
وملهي ف جبر كسور الصبر
فجأة يمد صوابعه ف راسي
ينكش ع اللي سقاني المر
لما حفيدي يشوف طيارة فيترجاني
ويرجع بيا سنين من عمر
كت طيارة إيديك تصنعها وتطيّرها
وتجري وراها
وأجري وراك
كان القلب بيتلقاك
يقعد جنبك
يحضن قلبك
وأرمي الطرحة وألملم فرحة بدرها هواك
حوالين مني
وجوّه النني
لما عنيك تديني الخيط
وتروح تقعد جنب الحيط
اللي مسوّر فيلا البرعي وبنتهُ سنية
كنا أنا وأنت وفوزي ونادية
يوماتي بنلعب ف العصرية
ف تقوم هى
زارعة عنيها ف فتحة حيط
فاكر لما الخيط كان ينزف
لما دموعها تلامس خده
كنت أنا برضه بابكي عشانها
وإنت تسد عليها الفرحة
ب طارة حديد
سيبك منها دي ناس ف العالي
بيوتهم طوب وبيوتنا جريد
وأما الشمس تسيب حتتنا وتسكن بيتها
نلقى الضي ف عينها بيلمع
نلمح نظرة عليك بتطير
تلمس كتفي وترسى ف كفك
وترجع تاني تنام ف جفونها
وإحنا بنلعب سوا فوازير
وأما غافلنا الحاج دياب
واتسرسبنا لسطح البيت
نبت حزن النظرة ف عينك
دمعة جمر
إتأكدت إن أنا حبيتك
وإن سنية برغم شللها
كنت عليك من شوقها باغير
نظرة حب وطارحة حمام
ونا ف عيوني وقلبي منبّت
لسه يادوب حبة عصافير
كت طيارة تشبه فعلا لون طيارتك
والخيط آخره ف فيلا سنية .

اترك تعليقاً